Speaker A
كفّارة يا "سيد"! أنت فينك يا راجل؟! 15 سنة سجن يا "عصام"، 15 سنة! وعلى كدا، تُبت بقى يا "أبو السيد"؟ وهو السفر عبر الزمن ممكن يا "عصام"؟!
حلقة الدحيح عن الحسن بن الهيثم، العالم الإسلامي الذي سبق عصره وأسس المنهج العلمي في القرن العاشر الميلادي.
Key Takeaways
- ابن الهيثم كان عالمًا متعدد التخصصات ومؤسسًا للمنهج العلمي التجريبي.
- العصر الذهبي الإسلامي كان فترة ازدهار حضاري وعلمي كبير.
- التجربة العلمية والملاحظة الدقيقة كانت من أهم سمات عمل ابن الهيثم.
- مشروع السد كان فكرة متقدمة جدًا لكن واجه معارضة بسبب التكاليف والظروف السياسية.
- ابن الهيثم ساهم بشكل كبير في علوم البصريات التي أسست لفكرة الكاميرا.
What the video covers
- تقديم سياق تاريخي لمصر في سنة 1006 ميلاديًا وعصر الحاكم بأمر الله.
- التعريف بالحسن بن الهيثم، مولده في البصرة ودراسته المتعددة في الرياضيات والفلك والفلسفة والهندسة.
- هروب ابن الهيثم من تهمة الزندقة في البصرة وانتقاله إلى مصر.
- تفسير اهتمام ابن الهيثم بالتجربة العلمية والمنهجية القائمة على الملاحظة والاختبار.
- محاولاته لإقناع الحاكم بأمر الله بفكرة بناء سد لتخزين مياه الفيضان لمواجهة الجفاف.
- الصعوبات التي واجهها ابن الهيثم في تطبيق مشروع السد بسبب المعارضة والتكلفة.
- شرح تجارب ابن الهيثم العلمية في البصريات واختراعه للكاميرا الغامضة (القُمرة).
- توضيح منهجية ابن الهيثم العلمية التي تعتمد على الملاحظة، الفرضية، والتجربة.
- تأثير عصر بيت الحكمة في بغداد على ازدهار العلوم الإسلامية وظهور علماء كبار مثل جابر بن حيّان والخوارزمي.
- تسليط الضوء على أهمية ابن الهيثم في تأسيس المنهج العلمي الحديث.
Chapters
- 00:00مقدمة وحوار تمهيدي
- 02:56مقدمة الحلقة وتعريف الحسن بن الهيثم
- 04:58نشأة ابن الهيثم ودراسته
- 06:34هروب ابن الهيثم من البصرة وتهم الزندقة
- 08:14تجربة ابن الهيثم العلمية وفلسفته
- 11:10مشروع السد وفكرة تخزين المياه
- 12:36معارضة مشروع السد والتحديات
- 14:30تجارب ابن الهيثم في البصريات والمنهج العلمي
- 21:57تفسير المنهج العلمي وأثر ابن الهيثم
- 31:12خاتمة وتلخيص دور ابن الهيثم
Full Transcript — Download SRT & Markdown
Speaker A
يعني إيه؟! يعني، مستحيل أتوب ياد! أمّال بتيجي فصول محو الأمية ليه؟! ما أنت بتتكلم زي المتعلمين!
Speaker A
كنت خلّيك في الشِمال! يا حمار... ما العلام هو اللي هيخلّيني حرامي، بس على كبير.
Speaker A
أنا لو كنت متعلّم ومتنور، ما كانش زماني اتمسكت من 15 سنة. دلوقتي خلاص، أنا عارف سكّتي، أول ما ألاقي بس "نينا" مراتي حبيبتي.
Speaker A
هو أنت ما حدش قالّك حاجة على "نينا"؟! مالها "نينا"؟! "نينا" يا "سيد"... انطق يا "عصام"، "نينا" مالها؟!
Speaker A
"نينا" بقى اسمها "سعاد"، وبطّلت رقص. إيه؟! "نينا" بطّلت رقص؟! أمّال بتعمل إيه دلوقتي؟! صباح الخير، يا جماعة، أنا ميس "سعاد"، وهأدرّسلكم...
Speaker A
"سيد"؟! "نينا"؟! إيه اللي انتي عاملاه في نفسك دا يا "نينا"؟! على آخر الزمن، تشتغلي مدرّسة؟!
Speaker A
طبعًا، ما أنت مَرمِي في الحبس، ما كنتش تعرف الحَوجة اللي كنت فيها أنا والعيال!
Speaker A
ولاد الحلال، ربنا ياخدهم، دلّوني على الطريق الصح! إخص يا "نينا"! إخص! إيه الزمن الجميل، اللي إحنا عايشين فيه دا؟!
Speaker A
للأسف! للأسف! أنا حتى ما اتجوزتش أعز أصحابك! بجد؟! خسارة والله! دا أنا كنت جاي متحمس أسيّح دمه!
Speaker A
بالعكس... اتجوزت دكتور محترم جدًا، مش بتاع مشاكل خالص، وبيحبك وبيقدّرك كإنسان. وعيالنا يا "نينا"؟!
Speaker A
طبعًا، ودّيتوهم أحسن مدارس ولبّستوهم أحسن لبس، مش كدا؟! أنا حاولت أخلّي حياتهم أصعب، بس والله ما قدرتش!
Speaker A
"نينا"... أنا عايزك تجاوبيني بمنتهى الصراحة... أرجوكي... ما فيش حد من عيالي طلع سَوْ؟ طلع مدمن؟ "سعيد".
Speaker A
يا حبيب قلب أبوك، يا مشرّفني! ماله "سعيد"؟ مدمن قهوة، كلب شغل، مصنّف في قائمة "فوربس" لرواد الأعمال العرب!
Speaker A
أنا... أنا عرفت أنا هعمل إيه! أرجوك يا "سيد"، ما تعملش حاجة في نفسك! أنا هدفن أحزاني في الشُرب، هشرب قهوة ليل ونهار، هشتغل وأجتهد وأتعلّم، وأبقى أفضل نسخة ممكنة من نفسي.
Speaker A
أرجوك يا "سيد"، اعقل، دا كلام الطبقة المتوسطة، مش كلامك أنت! قوليله! أنا ما اسميش "سيد"...
Speaker A
أنا اسمي مستر "مراد". أرجوك يا "سيد"، أنت كدا هتبني مستقبلك! مش هيبقى أنت والولاد!
Speaker A
يا "سيد"! "سيد"! هو هيبقى فيه حصة النهاردة ولّا إيه؟! لأن عندي معاد بنك كمان ساعة، وأنتي عارفة، دي سرقة، مش هينفع أتأخر!
Speaker A
امشي! امشي! أعزائي المشاهدين، السلام عليكم ورحمة الله وبركاته، أهلًا بكم في حلقة جديدة، من برنامج "الدحّيح"!
Speaker A
عزيزي المُشاهد الجميل، إحنا مش هنروح أي حتة، نحن في "مصر"، هنرجع بس ورا 1000 سنة، سنة 1006 ميلاديًا، البلد كانت لسة بتاخد نَفَسها وبتنتعش في عصر "الحاكم بأمر الله"، الراجل كان لسة متصدّي لثورة حصلت ضده.
Speaker A
"يا ساتر يا رب، يا (أبو حميد)! إيه اللي حصل؟ طمنني!" والله، واحد من شباب بني "أُمَيّة" يُدعى "أبو ركوة"، والراجل دا، زي ما كان الدكتور "إبراهيم العسّال" ساعات بيقول: "بيمثّل يا أستاذ (سيد) خطر أكبر من الثورات والجيش!" بعد هذه الثورة، البلد بتنتقل من حالة من الاستقرار
Speaker A
إلى حالة من الهشاشة، إحنا أمام سنين جاية من الجفاف بتنذر بمجاعة! هنا، "الحاكم بأمر الله" احتاس، و"مصر" بدأت تطلب مساعدات من البلاد اللي حواليها.
Speaker A
بيفضل الوضع كدا، لحد ما بيوصلّه كلام بيردده أحد الرجال، هذا الكلام بيقول... بمعنى إن "أنا لو كنت في (مصر)، وعندي (النيل) دا، كنت عملت شغل ينفع (مصر) وقت زيادة (النيل) ووقت النقصان." "الله! طب مين يا (أبو حميد) الراجل دا؟!
Speaker A
ولماذا مبالغ في ثقته كدا؟!" الراجل اللي بكلمك عنه دا كان راجل حقه يبالغ، لأنه كان راجل استثنائي في زمن استثنائي، مش محتاج أقولّك كتير إن أنا اللي بكلمك عنه هو "الحسن بن الهيثم".
Speaker A
الزمن الاستثنائي اللي بكلمك عنه هو العالَم الإسلامي، بالظبط بالظبط من القرن التامن للقرن 13 ميلاديًا، زمن المؤرخين بيَصِفوه بإنه زمن مزدهر حضاريًا جدًا، لدرجة إن البعض سموّه "العصر الذهبي للإسلام"، عصر بيبدأ سنة 786 ميلاديًا، لمّا "هارون الرشيد" بيأسس "بيت الحكمة" في "بغداد"،
Speaker A
دا المكان اللي اتعمل عشان يبقى مركز متخصص في الترجمة والبحث. "بيت الحكمة" كان له تأثير مهم جدًا جدًا في العالم الإسلامي وقتها، لأنه سهّل إن الناس تقرا وتتعلم، ويبقى فيه فعلًا ثورة ثقافية في المكان.
Speaker A
بفضل "بيت الحكمة"، ظهر بعد كدا علماء مهمين جدًا، في "الكوفة" مثلًا، بنشوف "جابر بن حيّان"، "أبو الكيمياء"، في "خوارزم"، بنشوف مين؟ "الخوارزمي"، بسم الله الرحمن الرحيم، مؤسس علم الجبر.
Speaker A
وفي "البصرة"، بنشوف ميلاد بطلنا "الحسن بن الهيثم"، اللي اتولد سنة 965 ميلاديًا. "ابن الهيثم" هيدرس الرياضة والفلك والفلسفة والطب والهندسة، زمان، العالِم من دُول كان بياخد كل شُعَب الثانوية العامة!
Speaker A
اللي التنسيق بيجيبه، بياخد كل حاجة تحته! "(أبو حميد)، بس أني ملاحظ حاجة غريبة بتحصل.
Speaker A
ازاي يبقى فيه كل هؤلاء العلماء العظماء، في عصر واحد زي (الحاكم بأمر الله)؟! ما تآخذنيش يعني!
Speaker A
أنت يا (أبو حميد) في حلقاتك قبل كدا وصفت إن هذا العصر كان عصر مليء بالغرائبيات!" الحقيقة إن "ابن الهيثم" ما جاش "مصر" عشان ينقذها، لأ، دا كان هربان من "البصرة"، ليه؟ لأن "ابن الهيثم" في "البصرة" كان عنده سُمعة إن هو مهندس شاطر جدًا،
Speaker A
كان بيجيله ناس من جميع أنحاء المدينة، عشان يعملّهم مخططات للبيوت بتاعتهم، مهندس معماري بيرسم الرسمة، وفيه ناس تانية بُناة هُما اللي بيبنوا البيت.
Speaker A
اللي هيحصل بقى إن في يوم من الأيام هيجيله Order، ولكن الـOrder جاي من أمير "البصرة" شخصيًا، زي ما تقول كدا، تكليف، إنه هيعمل مخطط لقصر الحاكم، مش بس كدا، دا هو اللي هيبنيه بنفسه، يعني، هيبقى معماري ومدني.
Speaker A
قد تظن إن "ابن الهيثم" فرح بالمقاولة الكبيرة اللي جاياله دي، "قصر الأمير دا هنخنصر فيه بنود...!" ولكن "ابن الهيثم" كان زيه زي كل علماء زمنه، راجل مخلص للعلم، لا بيحب يسيب كُتُبه ولا يهجر علومه، ساعتها، قام قايل لحاكم "البصرة"...
Speaker A
"أنا مخ، عايز حد يبينلك؟ شوف حد فواعلي." "ابن الهيثم" ما كانش عارف إن رده دا هيُعتبَر إهانة كبيرة جدًا، وهيستفز أمير "البصرة"، عشان ينتقم منه بأفظع طريقة ممكنة، هيعمل إيه؟ هيتهمه بالزندقة.
Speaker A
طبعًا، مش محتاج أقولّك إن تهمة بهذا الحجم لحد هذه اللحظة ممكن يطير فيها رقاب، ودا بيبقى السبب إن "ابن الهيثم" بيهرب من بلده، "البصرة"، وهتفضل التهم تجري وراه من "بغداد" لـ"الشام" لـ"مصر"!
Speaker A
"(أبو حميد)، لسة ما زال فيه ثغرة في السردية! معلش يعني، أنت بتقول إن هو راجل ذكي وعالم عبقري وممتاز، بقى هو بيهرب من الحُكّام الظلمة، عشان يروح لـ(الحاكم بأمر الله)؟!
Speaker A
دا كأنه بيهرب من (ستون كولد ستيف أوستن) لحضن (الأندر تيكر)!" في الحقيقة، الموضوع غريب، واحد مسجل خطر بالنسبة للحُكّام، رايح لـ"الحاكم"!
Speaker A
ولكن اللي أنت ما تعرفهوش عن "ابن الهيثم" إن جنب عبقريته الفذة، فهو مفتون بفكرة واحدة، وهي التجربة، "أنا ما بشتريش من اللي قبلي، أنا بشوف بعيني وأجرب." على حسب تعبيره...
Speaker A
"أنا مش دوري أقرا للناس القديمة وأحفظلها، بالعكس، دا أنا ممكن أتهم معرفة ما قريتهاش لمجرد إني ما اختبرتهاش بالحُجة، لازم أنا أختبر، لازم أنا أناقش." الجفاف، اللي "مصر" كانت بتعيشه وقتها، هيكون أحسن فرصة إن "حسن بن الهيثم" يخرج برة حدود الكتاب،
Speaker A
عشان يعمل تجربة علمية حقيقية تستحق المخاطرة اللي هو عملها، حتى لو كان هيخاطر مع مين؟ مع "الحاكم بأمر الله" شخصيًا.
Speaker A
"ابن الهيثم"، يا عزيزي، مسك خريطة "مصر"، وقعد يفكر في حل لمشكلة الجفاف والفيضان، وأول ما اللمبة نوّرت، وجت لحظة الـEureka إياها، هيبعت لـ"الحاكم بأمر الله"، ويقولّه: "أنا لقيت الحل!" "الحاكم" ما بيصدّق، وصلتله الرسالة من هنا، راح باعت لـ"ابن الهيثم" يجيله "مصر"،
Speaker A
وقام عامل معاه أحلى واجب ضيافة، قعدّه في بيت شديد الفخامة، وادّاله 3000 دينار Deposit.
Speaker A
"وقولّي إيه بقى الحل يا عم (ابن الهيثم)!" هيقوم "ابن الهيثم" يقولّه: "ببساطة، يا سيدي، إحنا محتاجين، زي ما تقول كدا، بناء، يحتفظ بالمياه وقت الفيضان، يخزنهالنا، عشان نستفيد بيها أيام الجفاف، نطلّع ونشرب." "ياه يا (أبو حميد)! كل دا بيحاول يبيعله فكرة السد؟!"
Speaker A
مش محتاج أقولّك إن الحل دا وقتها كان شيء صعب وملحمي، لسة تقريبًا من 70 سنة كان صعب، لو تفتكر، معاناة "عبد الحليم حافظ" مع الموضوع!
Speaker A
راح على البنك اللي بيساعد ويدّي، رد قال: "ما لكومش عندي!" والضربة جت من معلّم، خلّت الاستعمار يسلّم!
Speaker A
وجاب سلاح وطيارات وغواصات ودبابات، كل دا! فالسد تاريخيًا صعب! وبرغم إن الفكرة كانت عبقرية، و"الحاكم بأمر الله" كان متحمس ليها، إلا إن كل اللي حواليه ما اقتنعوش، وأولهم "ست المُلك"، أخته، لو تفتكر، قالتله: "أولًا، يا حبيبي، المشروع دا مكلف جدًا!
Speaker A
ثانيًا، لو اتنفّذ، هياخدله من 10 لـ20 سنة، والمصريين لسة طالعين من حروب وجفاف، ما حدش هيستحمل!
Speaker A
ثالثًا، ودا الأهم، أنا شايفة، يا أخويا، إن السد دا غير قابل للتنفيذ." وقالت لـ"ابن هيثم": "وأنت رايح بقى على (أسوان) تعمل السد، ابقى عدّي على (الأقصر)، هتلاقي هناك معابد عظيمة، لو مشروعك كان ممكن يتعمل، كان زمانه اتعمل في (الأقصر)!
Speaker A
اللي ما عملهوش المهندس الفرعوني زمان، أنت ما تقدرش تعمله." "ابن الهيثم"، بالرغم من تاريخه مع الحُكّام، ولكنه في شغف العِلم ما بيهزرش، فهيحاول يقنع "ست المُلك" ويقولّها: "زمان، (اليمن) كان عندهم سد اسمه سد (مأرب)." فـ"ست المُلك" ردت عليه وسألته:
Speaker A
"راح فين دا دلوقتي طيب؟" فـ"ابن الهيثم" ما بيرتبكش، وبيقولّها إن السد دا انهار، لأنه ما كانش بيتعملّه صيانة، "إحنا هنبقى نعمل للسد بتاعنا صيانة." الحوار دا بيبيّنلك عِناد العالِم ونفاد صبر البلاط.
Speaker A
واللي بيحصل بعد كدا، إن "ا
Speaker A
وابتدا يسمع مزيكا حزينة في دماغه، وبيدرك إن الموضوع يبدو كدا إنه صعب، الـDesign على الورق تمام، الحسابات تمام جدًا، ولكنه هيقول بمرارة...
Speaker A
مش هينفع يتعمل سد على نهر "النيل"، ببساطة، لأن "النيل" نهر موسمي، مش نهر هادي ومستقر، فيه احتمال كبير يحصل فيضان ضخم كل سنة، وعشان تعمل سد يتحمل كل كمية الميّه دي، فانت محتاج مواد بناء تقدر تقاوم ضغط مهول،
Speaker A
دا غير الأدوات اللي محتاجها عشان تحفر تحت الميّه، احنا لسة، يا عزيزي، سنة 1006!
Speaker A
"الله يا (أبو حميد)! تاني، يا (أبو حميد)، انت بتفاجئني بهذا الرجُل، ازاي شديد الذكاء، وهو ما يعرفش دا؟!" اللي عايز أقولهولك في هذه القصة مش إنه غلط، أو إنه فشل، ولكن إنه بالرغم من الكلام، اللي الناس قالته، بيروح وبيجرب بنفسه.
Speaker A
طبعًا الوضع بقى صعب، اللي أصعب من إن انت تفشل في بناء سد، هو إن انت ترجع لـ"الحاكم بأمر الله" ولـ"ست المُلك"، اللي قالتلك: "مش هينفع." وتقولّهم: "بصراحة، انتم كان معاكم حق، مش هينفع فعلًا!" "ابن الهيثم" بيرجع الطريق وهو متوتر،
Speaker A
عمّال يفكر ويتأمل، يا ترى إيه اللي هيحصل فيه، لمّا يشوف "الحاكم بأمر الله"، ويقولّه إنه مش هينفع.
Speaker A
بيفضل الوضع كدا، لحد ما بتيجي لحظة المواجهة المنتظرة، "الحاكم بأمر الله" بيستغرب إن المهندس راجع بدري، "دا مش معادك!
Speaker A
المفروض تبقى بتصب خرسانة دلوقتي!" "ابن الهيثم" بيروح لـ"الحاكم بأمر الله"، وبيقولّه الحقيقة على بلاطة...
Speaker A
"احنا، للأسف، في هذا الزمن، مش هينفع نعمل هذا المشروع!" التوقع، يا عزيزي، كان إنه لمّا يقول لـ"الحاكم بأمر الله" هذا الخبر، إن "الحاكم بأمر الله" هيقتله.
Speaker A
ولكن المفاجأة إن "الحاكم بأمر الله" بيقولّه: "ما أشوفش وشك تاني! اتكل على الله!" "(أبو حميد)، ما تآخذنيش، بس انت كدا بتتكلم على (الحاكم بأمر الله) غير اللي انت اتكلمت عنه، في الحلقة اللي قبل كدا، أنا شايف الراجل في هذه الحلقة عاقل ومنطقي وعقلاني وطيب!
Speaker A
ازاي ساب (ابن الهيثم) يمشي؟!" الحقيقة، يا عزيزي، زي ما اتكلمنا في حلقة "الحاكم بأمر الله"، إن فيه حاجات كتيرة سهل إنها تخلّينا نفسر اللي عمله "الحاكم بأمر الله" كجنون، ولكنه، مش عايزين ننسى، أنه لم يكُن عبيط، أسهل حاجة في الدنيا
Speaker A
كانت إنه يقتل "الحسن بن الهيثم" ويعمل عليه ملوخية، ملوخية "الحسن"! بس لو دا حصل، أول حاجة، هيخسر عالِم مهم.
Speaker A
ثانيًا، هيخسر علماء كتير جدًا، يترعبوا إن هُما ييجوا البلاط بتاعه، وهو كان في وسط أزمة صعبة جدًا في "مصر"، زي ما قُلتلك، فكان مستني أي عالم ييجي يقولّه حل.
Speaker A
"الحاكم" هيكتفي بإنه يرجّع "الحسن بن الهيثم" لوظيفته القديمة، الوظيفة اللي كان بيشتغلها زمان بجوار تحصيل العلوم، هيعمل إيه؟ هيرجع محاسب.
Speaker A
"ياه يا (أبو حميد)! يعني (ابن الهيثم) كان راجل خريج كلية تجارة زيي؟!" عزيزي، الراجل كان محاسب في ديوان الرواتب المَلَكي، وقبل ما تحسده، خلّيني أقولّك إن هو كان من أقل الرواتب، "الحاكم بأمر الله" خد منه الـ3000 دينار، اللي كان لسة مدّيهومله من شوية،
Speaker A
وهيخلّي مرتبه الجديد 4 دينار. "ابن الهيثم"، في هذا الوقت، كره حياته، كل يوم، من الشغل للبيت، ومن البيت للشغل، ولا أجدعها Corporate Slave!
Speaker A
"يا جماعة، أنا عالِم مرموق! إيه الشغلانة دي؟! أنا كدا نزلت 7 طبقات!" على حد تعبيره، يا عزيزي، من عزة نفسه، كان بيقول...
Speaker A
"يعني، أنا أبقى شمس كبيرة ممكن تنوّر (الأرض)، فانتم تعملوني لمبة نيون؟! بـ4 دينار في الشهر يا مفتري؟!" وبدأ "ابن الهيثم" يفكر إنه يهرب تاني، زي ما هرب من "البصرة"، بس فكر كدا: "آخرتها إيه؟ الهروب دا ما لهوش نهاية؟!"
Speaker A
الراجل كان متأكد إنه لو قعد يوم زيادة في هذا المكان، هيتجنن، هيقول: "إيه دا؟! طب ما دي فكرة حلوة! طب ما أتجنن!" "ابن الهيثم"، يا عزيزي، بيقرر إن هو يعمل مجنون، وهيقعد "ابن الهيثم" بقى يكلم نفسه، يضحك مع نفسه، شوية، ويعيّط مع نفسه،
Speaker A
رجالة "الحاكم بأمر الله" بيروحوا لـ"الحاكم بأمر الله"، ويقولوله: "الحق! الراجل لسع! ما ينفعش واحد بالأعراض دي يبقى هو اللي ماسكلنا الفلوس في الديوان!" وهنا، "الحاكم" هيفصل "ابن الهيثم" من البلاط، ولكنه هيحدد إقامته في البيت، "أصل انت، لا مؤاخذة يعني، لو هتعمل عليا مجنون،
Speaker A
أنا (الحاكم بأمر الله)، انت ما تعرفش التاريخ بيقول عني إيه. طالما انت عاملّي مختل عقليًا، أنا هخلّي هُناك اتنين حراس يراقبوك، ويقعدوا معاك طول النهار والليل في بيتك يتأكدوا انت مجنون ولّا لأ، يا تعترف إنك عاقل، يا هجننك بجد!"
Speaker A
خلّيني أحرق قلبك، يا عزيزي، وأقولّك إن الوضع فضل مستمر كدا 3 سنين، "ابن الهيثم" كل ما يشوف الحراس، يقعد يصوّت ويعمل الشويتين، يجري ورا ضلّه، يكلم نفسه، أصبح مجنون!
Speaker A
وبالليل، أول ما يتأكد إن هُما ناموا، يقعد يقرا ويدرس ويهندس ويذاكر، يمسك العقل. الحراس هيبدأوا يشكّوا إنه بيلعب معاهم، فبيعملوله خُرم في الباب، عشان يتجسسوا عليه منه، ولكن، يا عزيزي، اللي ما كانوش يعرفوه، إن الخُرم اللي عملوه دا
Speaker A
هو الخُرم اللي هيغيّر تاريخ البشرية. "ياه يا (أبو حميد)! هو هو دا الخُرم اللي هيغيّر تاريخ البشرية؟!" لو شُفت، يا عزيزي، حلقة "نيوتن"، هتعرف إن أعظم اكتشافاته جت وقت الطاعون، ليه؟ بسبب قعدته في البيت، دا برضه بالظبط اللي حصل مع "ابن الهيثم"،
Speaker A
الـ3 سنين اللي كان محبوسهم كانوا أهم فترة في حياته. ويبدو كدا إن دي سمة مشتركة بين كل اللي غيّروا التاريخ، بيستثمروا قعدة الـLiving، تفخيد الرجُل العبقري دائمًا مثمر!
Speaker A
اللي بيحصل مع هذا الخُرم، إن "ابن الهيثم" لمّا جرب ضلمة الأوضة، قدِر يشوف النور، مجازيًا وحرفيًا، النور لمّا دخل من باب أوضته، عمل دايرة على الحيطة، دا لفت نظر "ابن الهيثم" جدًا، كل حاجة الإنسان العادي كان بيشوفها غريبة،
Speaker A
هو كان بيشوفها مشروع تجربة، بدأ يركّز مع دايرة النور، اللي كانت في الحيطة، ويلاحظ فيها تحركات، شوية شوية، وبيدرك إن التحركات دي مش تهيؤات عنده، ولا هلوسة من القعدة لوحده، دي صورة للناس اللي ماشية برة، بس صورة مقلوبة، Flipped،
Speaker A
وهنا، ادّاها واحدة بأعلى صوته: "وجدتُها! وجدتُها!" الحراس لمّا سمعوه، قالولك: "دا تلاقيها نوبة جنان يا عم!
Speaker A
(ابن الهيثم) بيمثل على (الحاكم) إن هو مجنون، فاحنا نمشّي الدنيا، يلّا يا عم، مبروك!" بس Meanwhile، "ابن الهيثم" كان في أوضته بدأ التجارب وبيدوّن ملاحظاته، الحراس بيلاقوه ماشي بالنهار، عمّال بيلف يمين وشِمال، بيتفرج على انعكاسات كل حاجة حواليه،
Speaker A
شوية، بيلاقوه بيكلم نفسه، بس بشكل مختلف المرادي، المرادي غالبًا مش مهتم إن حد يشوفه وهو بيكلم نفسه، شوية، بيلاقوه رابط خيط في عصاية، وبيوصّل الخيط دا في ضل العصاية، وبعد كدا، بيقوم مطلّع شوية ورق، ويقعد يكتب ويرسم، بالنسبالهم، هو دا شغل الجنان الحقيقي، الراجل دا مجنون مجنون!
Speaker A
ما يعرفوش، يا عزيزي، إنه كان في هذا الوقت بيغيّر العالم تمامًا، والحبسة اللي الراجل دا كان فيها هي السبب في إن انت بتشوفني دلوقتي، هي اللي فاتحة بيت حاجة اسمها "إنستجرام"، "الحسن ابن الهيثم" بيخترع ما يُعرف بـ"الغرفة المظلمة"،
Speaker A
أو في قول آخر، "القمرة". لو رجعنا، يا عزيزي، بنفسنا لورا كدا، هنلاقي نفسنا خبطنا في القرن الخامس قبل الميلاد، هناك، هنشوف الفيلسوف اليوناني "إمبيدوكليدس" راسه وألف سيف إنه يقولّك إن الكون بيتكوّن من 4 عناصر، ميّه، هوا، تراب، نار.
Speaker A
- "يا عم دُول أبراج!" - "لأ!" الراجل كان مصمم إن الكون بيتكوّن من الـ4 عناصر دُول، وبما إننا جزء من هذا الكون، فاحنا زيّنا زيه.
Speaker A
كان بيقول إن "أفروديت" إلهة الجَمال هي اللي عملت العين من الـ4 عناصر دُول، هي اللي خلّت الإنسان عنده العين البرّاقة دي.
Speaker A
كمان، بيقول إن "أفروديت" سابت في عيون الإنسان شوية نار صغيرين، عشان العين تطلّع شعاع النور، فلمّا شعاع النور ينزل على الجسم، الإنسان يشوف.
Speaker A
خُد بالك، يا عزيزي، دا كان Controversial جدًا، الناس كانت فاكرة إن الإضاءة جاية من العين، يعني، انت عينك كانت بتنوّر الحاجة ليك، الكلام دا بيُسمّى بـ"نظرية الانبعاث"، الـEmission Theory، اللي ظهر فيه مشكلة بسيطة جدًا ومنطقية، لو العين بالفعل بتطلّع نور،
Speaker A
ليه احنا ما بنشوفش حاجة في الضلمة؟! الحاج "إمبيدوقليدس" كانت إجابته بمنتهى البساطة إن الشعاع اللي بيطلع من العين دا لازم يتفاعل مع الإضاءة بتاعة الشمس، نور عينك على نور الشمس، تشوف كل حاجة حواليك، نور الشمس بس، ما تشوفش.
Speaker A
طبعًا، الكلام دا يبدو، ليا وليك ولأي حد، هَبَل، ولكن خلّيني أقولّك إن الكلام دا زمان كان له Credibility وثقل علمي كبير، مش عايز أقولّك مين اللي كان مدّيله العلامة الزرقا.
Speaker A
- "قول، يا (أبو حميد)، مين، وحياتك!" - "أفلاطون". "إيه؟! (أفلاطون)؟! يا أخي إخص! مش بس "أفلاطون"، هناك كمان "إقليدس"، عالِم الرياضيات العظيم، الراجل اللي كتب الـOptica في القرن التالت قبل الميلاد، وراح مدخّل قوانين الهندسة في الحوار، اللي بقولّك عليه دا،
Speaker A
وقام قايلّك: "يا جماعة، الضوء بيشمي في خطوط مستقيمة، بس العين هي مصدر الشعاع." هنا، الناس سألته سؤال منطقي جدًا: "لو، يا عم الحاجّ انت، العين هي مصدر الشعاع، فازاي الإنسان العادي بيشوف نجوم الليل وهي في السما؟ مع إن يبدو كدا، كما هي شكلًا، إنها بعيدة أوي!"
Speaker A
هيقوم الراجل رادد عليهم ببساطة: "يا جماعة، شعاع العين دا سريع جدًا، ما تأمنوش مكره، دا يوصل لأي حتة." "طب يا (أبو حميد)، وكان إيه ردهم؟" لأ، يا عزيزي، الموضوع مات على كدا قرون!
Speaker A
بُهتوا لمئات السنين! الناس فضلت فاكرة إن العين بتُصدر نور لحد ما جُم الحراس عملوا عين سحرية في باب "ابن الهيثم".
Speaker A
"ابن الهيثم" هيبدأ يدوّن ملاحظاته عن الضوء، الضوء بيشمي في خطوط مستقيمة آه، ولكنه ما بيخرجش من العين، عشان الإنسان يشوف، لازم يبقى فيه مَصدَر للضوء.
Speaker A
لمّا النور بيقع على أي جسم، بيحصلّه حاجة من 3، فيه شوية من النور بيتم امتصاصهم، وفيه شوية بينعكسوا، وفيه شوية بيعَدّوا، بينفذوا.
Speaker A
احنا عشان نشوف، محتاجين نركّز على الشوية اللي بينعكسوا، دُول اللي لمّا بينعكسوا، بيقوموا رايحين للعين، فنشوف، "ابن الهيثم" بيثبت دا عن طريق تجربة "الغرفة المظلمة"، أو "القمرة".
Speaker A
"(أبو حميد)، هي تجربة الأوضة المظلمة دي، دي اللي كان محبوس فيها؟!" لأ، يا عزيزي، دي اللي بعد كدا بناها.
Speaker A
يقطعني! أنا نسيت أقولّك، مش "الحاكم بأمر الله" مات، و"ابن الهيثم" خد إفراج؟ "يا (أبو حميد)، أنا مش مصدّق!" الحقيقة، يا عزيزي، "ابن الهيثم" برضه ما كانش مصدّق، في يوم من الأيام، لقى الحراس دخلوا عليه، بيقولوله: "اتفضل، اطلع، براحتك، عيش!
Speaker A
شويتين الجنان دُول بطّل تعملهم، احنا خلاص، تعِبنا." وقتها، "ابن الهيثم" هيستعيد حريته، فهيقوم يعيد تجربة القمرة تاني، هيعيدها على رواقة وبدقة أكبر بعيد بقى عن الحبس اللي كان محبوسه، هيقوم عامل هو الخُرم بنفسه جوا القمرة، وهيوصل هنا لنتايج في غاية الأهمية،
Speaker A
"ابن الهيثم" هيقعد مع القمرة على مزاجه. وهيبدأ يوصل لنتايج مهمة جدًا وهو شغّال عليها، أول حاجة، كل ما كان الثقب بتاع القمرة، اللي زي ما باين في الصورة دا، أضيَق، كل ما كانت الصورة أوضح، بس إيه؟ أغمق.
Speaker A
عشان كدا، لو قُمنا جايبين جسم كدا، وحطّيناه قُدّام القمرة بتاعتنا، هنلاقي إن كل نقطة في هذا الجسم بتطلّع أو بتعكس ضوء في كل الاتجاهات، فلمّا الثقب بيكون واسع، كل نقطة من الجسم اللي احنا بنصوره دا بتدخل جوا القمرة بأشعتها من زوايا كتير،
Speaker A
الأشعة دي بتتداخل مع الأشعة اللي طالعة من نقط تانية في الجسم، فالصورة بتطلّع Blur، مشوّشة كدا، لكن لمّا بيبقى الثقب ضيّق جدًا، بيعدّي بس شعاع واحد، أو للدقة العلمية، مجموعة شعاعات ضيّقة جدًا من كل نقطة من النقط اللي موجودة في الجسم،
Speaker A
دي بقى بتتكوّن عند نقطة مقابلة واحدة، بس على الحيطة، فاللي بيحصل هنا، ما بيحصلش تداخل في الأشعة، فبالتالي، الصورة اللي عندنا بتبقى Sharp، واضحة.
Speaker A
تاني بقى ملاحظة لاحظها "ابن الهيثم" إن الصورة بتكون جوا القمرة أولًا مقلوبة. ثانيًا، حجمها بيكبر وبيصغر على حسب بُعد الجسم عن القمرة، وهيفسر دا بمعادلة رياضية بسيطة جدًا، لو قُلنا إن H دا هو ارتفاع الجسم برة القمرة، وD هي المسافة اللي بينه وبين الثقب،
Speaker A
وL هي المسافة اللي بين الثقب وبين الحيطة، اللي هتظهر عليها الصورة، وh هو ارتفاع الصورة عن الحيطة.
Speaker A
بما إن، زي ما قُلتلك، "ابن الهيثم" بيقول إن الضوء بيمشي في خطوط مستقيمة، فتخيل معايا، واحد واقف برة القمرة دي، عايزك تشد خط من راس الراجل دا يعدّي من الخُرم لحد الحيطة، وقوم شادد خط من رجله يعدّي الخُرم برضه لحد الحيطة،
Speaker A
هتلاقي إن على الحيطة صورة الراجل اتقلبت، وهتلاقي برضه إن بقى فيه مثلثين متشابهين فتلاقي، يا عزيزي، الـH على الـD بتساوي h على الـL.
Speaker A
بمعنى إن كل ما الخُرم بعِد عن الحيطة، كل ما الصورة هتكبر قُدّامك. طبعًا، مش محتاج تبقى فطين وذكي، ومش محتاج أقولّك، القمرة هي الأساس العلمي اللي اتبنت عليه فكرة الكاميرا.
Speaker A
"ياه يا (أبو حميد)! أنا ما خدتش بالي خالص! أنا قُلت دا يمكن تبقى صُدفة." انت فاكر "كوداك" هو اللي عملها؟!
Speaker A
عارف، يا عزيزي، تعامُل الإنسان مع العِجل أو البقرة؟ بياخد الجلد واللحمة واللبن، حتى الديل، بيعمله طاجن، أهو "ابن الهيثم" قرر يتعامل مع القمرة بنفس المنطق، "هستغلّها لحد النهاية، لحد ما أحلبها!
Speaker A
بما إن فيه ثقب صغير كدا كدا معمول، وداخلّي منه شعاع نور شبه الليزر كدا، طب ما بالمرة كدا آجيب مراية، وأثبت قوانين الانعكاس، خلّصنا الضوء اللي بينفذ، نشوف النور اللي بينعكس." وبالفعل، "ابن الهيثم" بيعمل تجارب الانعكاس، وبيثبت بالتجربة إن زاوية السقوط بتساوي زاوية الانعكاس.
Speaker A
وبما إن بقى الحاجة موجودة، ومش هنغسل مواعين، الترابيزة زي ما هي، زي ما هي كداهو، نستغلّها بقى، نطلع بقوانين الانكسار، راح جايبلي عصاية، حطها جوا كوباية ميّه، وسلّط عليه شعاع نور اللي جاي من الخُرم إياه، اللي مش هيعتقه،
Speaker A
وبدأ يحرك العصاية اللي حطها في الميّه دي بزوايا مختلفة، ولقى إن العصاية بتبان مكسورة وإن كل ما يغيّر الزاوية بتاعة الضوء، زاوية الكسر بتختلف.
Speaker A
هنا، هيعيد نفس التجربة، بس بكوباية إزاز، من غير ميّه، فيكتشف إيه؟ إن الضوء بينكسر لمّا ينتقل بين الأوساط المختلفة، الكوباية كان نُصها هوا، نُصها ميّه، غاز، وسائل يا بيه، وزاوية الانكسار بتختلف على حسب إيه بقى؟ إيه بقى في الوسيط؟
Speaker A
الكثافة بتاعة الوسيط، الـDensity، الهوا يختلف عن الميّه، يختلف عن الإزاز، كل واحد على كثافة أبوه.
Speaker A
وعلى عكس قوانين الانعكاس... كدا، يا عزيزي، معانا قوانين انعكاس، وقوانين انكسار. لسة فيه حاجة، يا عزيزي، لم نثبتها، وهي إن الضوء بيمشي في خطوط مستقيمة، هنا، "ابن الهيثم" هيحلّ عن القمرة شوية، ويجيب كذا مصدر للضوء براها، وهيشوف كل مصدر نور بينوّر فين على الحيطة اللي جوا القمرة،
Speaker A
مش هيعتق أمها! فهنشوف هنا "ابن الهيثم" بينوّر كل النور اللي برة القمرة، وبعدين، يطفي واحد، ويشوف أنهي نور اللي اختفى جوا، يخلّص واحد، يخش على اللي بعده... وهكذا وهكذا وهكذا.
Speaker A
"(أبو حميد)، أني الفيزياء أرهقتني أوي! أنا مش حمل كل هذه الزوايا، وكل هذه الانكسارات، كفاية!" خلاص، يا عزيزي، حلو أوي، احنا نسيب الفيزيا، ونروح للأحياء.
Speaker A
"ما فيش، يا (أبو حميد)، لغة أجنبية تانية؟! يكون أسهل يعني." تعالى، يا عزيزي، مع بعض نشوف ازاي بنشوف.
Speaker A
فاكر، يا عزيزي، لمّا قُلتلك إن "ابن الهيثم" رجُل موسوعي، وإن علماء زمان كانوا لا يعترفوا بالشُعبة العلمية؟ الراجل جنب شغله في الهندسة والفلك والرياضيات، هيكون دارس ممتاز للطب، كلهم 6 سنين، وسنة امتياز، مش قصة!
Speaker A
دراسة "ابن الهيثم" للطب هتساعده إنه يفسر ازاي الإنسان بيشوف، ازاي الإنسان بيبصر، وبرضه، باستخدام نفس القمرة.
Speaker A
"ابن الهيثم" بيقول إن: "يا جماعة، العين زيها زي القمرة، العين برضه فيها فتحة صغيرة بيخُش منها النور، والصورة بتتكوّن مقلوبة، بس جوا العين.
Speaker A
"إيه دا يا (أبو حميد)؟! يعني أنا بشوف الحياة Rotated؟! بالمقلوب؟!" لأ، يا عزيزي، مهو مخك بيعدل الصورة، فهنا، مخك Automatically بيخلّيك تشوف الحاجة معدولة، الحاجات اللي بنشوفها بالشقلوب، فهي نورها معدول، والحاجات اللي بنشوفها معدولة، هي أساسًا نورها مقلوب.
Speaker A
"ابن الهيثم" مش بس فسر هذه الآلية، لأ، دا هو اللي مسمّي أجزاء العين من جوا، معظم أجزاء العين ومسمياتها اللي نعرفها النهاردة، شغل "ابن الهيثم"، أول جزء مثلًا، القرنية، Cornea، دي "ابن الهيثم" وصفها بإنها أول سطح شفّاف بيدخل منه الضوء وبينكسر،
Speaker A
عشان يدخل فين؟ يدخل للجزء اللي بعده، القزحية، دي، يا عزيزي، بتبقى الدورة، دي بتبقى الدايرة الملونة اللي في نُص العين، دي اللي بتبقى فيها دايرة صغيرة اسمها "البؤبؤ"، الـPupil، البؤبؤ هو الحاجة اللي بتوسع وتضيق، عشان تتحكّم في كمية الضوء اللي معدّية،
Speaker A
عشان الضوء يقابل حاجة شفافة شَبَه العدسة، دورها هنا إنها تركّز هذا النور، عشان في النهاية يستقرّ على الشبكية، دي الـRetina، الجدار اللي في آخر العين، اللي بتتكون عليه الصورة.
Speaker A
طبعًا، مش محتاج أقولّك إن الإبصار ليس بهذه البساطة، ولا بهذا الاختزال المُذِل، احنا بطلنا في هذه الحلقة عالِم شرح الكلام دا من أكتر من 1000 سنة، ومش بس شرحه، دا أثبت تقريبًا كل حاجة تخصه بالتجربة.
Speaker A
"(أبو حميد)، أنا فاهم الأسلوب دا كويس، انت عمّال بترمي Keywords، والـKeyword هنا التجربة، عشان تعمل Transition للموضوع اللي جاي، ها؟ قول!
Speaker A
قول، يا سيدي، عايز تقول إيه عن التجربة؟ اتحفني!" أنا كنت، الحقيقة، قاصد أكرر الكلمة، لأن هوس "ابن الهيثم" بالتجربة هيوصّله لواحد من أعظم إنجازاته.
Speaker A
على مدار الزمن، البشر كانوا متعودين على الملاحظة، انت عارف، يا عزيزي، الإنسان ما يحبش يقعد في حاله، بيحب دايمًا يبقى مصدر صحافة صفرا للطبيعة، الحق! عاجل! ظاهرة طبيعية تثير الجدل على مواقع التواصل!
Speaker A
فضيحة سقوط الأمطار على جبل! شاهد التسريب! الإنسان يموت يشوف النمط اللي بيتكرر في الطبيعة، ويقفشه.
Speaker A
مثلًا، الواحد بيلاحظ إن فيه كام شهر في السنة بيبقوا حَرّ، وبعدين، بييجي بعدهم، كذا شهر بيبقوا سقعة، في الحَر دا بيطلع محاصيل معيّنة، أو زراعات معيّنة، في السقعة، بتحصل محاصيل تانية، هنا، البشر بيدركوا إن هُناك نمط، هُناك Pattern، هُناك تكرار،
Speaker A
فبالتالي، بيتوقعوا إنه هيحصل تاني، فلمّا بيحصل تاني وتالت، بيبدأوا يربطوا الخيوط ببعض، فيفترضوا مثلًا إن هذه الفاكهة هتطلع في وقت معيّن في السنة، عشان بيكون فيه الجو حَر.
Speaker A
بس الإنسان هنا، يا عزيزي، لسة ما اتأكدش من الفرضية دي، فيقرر البشر إن هُما ياخدوا خطوة جريئة، ويجربوا يزرعوا بنفسهم ويشوفوا، فرضيتهم صح، ولّا غلط، نطبّق على أرض الواقع، ونشوف.
Speaker A
دي ببساطة، المنهجية العلمية، والناس كانت تقريبًا بتعملها كدا بشكل فطري، بالبلدي كدا، من غير مسميات ولا قواعد، ولا إن دا نمط بيتم تكراره، ملاحظة، فرضية، تجربة، بنلاحظ ملاحظة معيّنة، نفترض إن فيه ظاهرة بتمثلها، بعدها، نقوم مجربين، نشوف هل التغيير اللي عملناه
Speaker A
بيُحدث التغيير اللي متوقعينه، دا اسمه "التجربة"، أهلًا بيك في المنهجية العلمية! قالوا: "الجَمل طلع النخلة." آدي الجَمل، وآدي النخلة.
Speaker A
قبل "ابن الهيثم"، كان هُناك ناس كتير، وأنا هنا بقول "ناس" مش "علماء"، الناس دي كانوا بيكتفوا بملاحظة النمط، وأحيانًا، يزوّدوا ويحطوا فرضية، من غير تجربة، شوف!
Speaker A
أيوة، يا عزيزي، العلم زمان كان Skimmed Experment، زي الحليب كدا! واحد زي "أرسطو" مثلًا ما كانش يحب يجرب خالص، كان ضد الفكرة، وكان له منطق، كان بيقولّك: "إن انت، يا حبيبي، لمّا تجربلي النهاردة، فانت ممكن في أجواء مختلفة، التجربة تجيب نتايج مختلفة،
Speaker A
إذًا، أنا سوف أحتكم إلى المنطق، إلى العقل، إلى الإثبات، الـProof، الظروف والسياقات متغيرة واحتمالاتها كتير، فأنا أستخدم هنا العقل، وليس التجربة." الـRationalism، بالنسباله، أفضل من الـEmpiricism!
Speaker A
النهاردة، أي عالِم صغير هيقولّك: "يا عم (أرسطو)، الموضوع له حل، انت ممكن تثبّت المتغيرات ببساطة، وتعمل DOE...
Speaker A
تصمم التجربة، تثبّت كل العوامل، ما عدا العامل، اللي انت عايزه تختبره، تجرب مرة واتنين، تثبّت متغيراتك، ما عدا المتغير اللي انت عايز تجرب فيه، هوبا، قفشت النمط، هوبا، الفرضية بقت نظرية يا معلّم، الله أكبر! الله أكبر!" "أرسطو"، يا عزيزي، كان، زي ما قُلتلك، رافض التجربة،
Speaker A
ما تفهمش دا عِند ولّا كسل، لدرجة مثلًا، يا عزيزي، إن نلاقي "أرسطو" بيقول إن الأجسام بتقع أسرع ناحية الأرض على حسب وزنها، شوف مين جسمه خفيف، ومين جسمه تقيل، وهتعرف مين هيوصل الأرض أسرع!
Speaker A
"طب، يا أسطى، جرب، اطلع فوق السطوح، ارمي حاجتين، شوف!" "لأ، هي كدا، ما أجربش!" وأقولّك، يا عزيزي، على الأنقح والغريب؟ "أرسطو" مثلًا كان بيقول إن عدد سنان الرجالة أكتر من عدد سنان الستات، الأغرب والأغرب إن هو كان متجوز مرتين،
Speaker A
ما فيش حتى ساعتين عصاري يقولّها: "افتحي، يا حبيبتي، أعدّ"؟! "افتحي بس بُقك، هثبِت نظرية بس!" الأغرب والأغرب، يا عزيزي، إن جت ناس بعد "أرسطو" برضه مؤمنين بنفس هذا الكلام، مع إن، يا جماعة، الستات هنا، اسألوا الستات، بصوا في أفواه الستات!
Speaker A
والحقيقة، عشان ما أكونش ظلمت أهل بقى العالَم القديم كلهم، كان هُناك ناس بتجرب، عشان بس سكان العالَم القديم ما يقفشوش!
Speaker A
"جالين" مثلًا كان بيجرب كل فرضياته على نفسه، مشكلته الوحيدة إن فرضياته تلات أرباعها في علاج الحروق، فكان بيولّع في روحه!
Speaker A
"بسم الله الرحمن الرحيم، أنا (هيفاء وهبي) في (دكان شحاتة)! هولعلكم في روحي!" زي ما انت شُفت، العلماء زمان شوية يحبوا التجربة، شوية يكرهوا التجربة، شوية يولّعوا في نفسهم.
Speaker A
بيفضل، يا عزيزي، الوضع كدا، لحد ما بييجي "ابن الهيثم" سنة 1021 ميلاديًا، ويكتب كتاب "المناظر"، لأول مرة في التاريخ، في كتاب "المناظر"، هيتحط قواعد منظمة، مش عارف، يا عزيزي، الاسم بيضحّكني For some weird reason!
Speaker A
لأول مرة في التاريخ، هيحط قواعد منظمة لأي حد عايز يبقى عالِم، أي حد عايز يبقى عالِم، يقرا كتاب "المناظر"، بدل المناظر اللي بتطلع تتكلملي باسم العِلم دي!
Speaker A
"ابن الهيثم" سمّى كل القواعد دي بنشوفه بيقول في مقدمة كتاب "المناظر" إن بالبلدي كدا، لو عايز تعمل بحث عن حاجة، أول حاجة مطلوبة منك إن انت تجمّع معلومات، بعد كدا، تحلل هذه المعلومات، تشيل الحقايق المُثبَتة على جنب، وبعد كدا، تبدأ تشك في الباقي،
Speaker A
أي حاجة كانت قبل كدا من غير تجربة، ما تصدّقهاش، أي كلام مُرسَل يتحط في حيز الشك هو كمان، اختبر كل شيء، على حسب تعبيره...
Speaker A
ودا كلام المقدمة بس، باقي الكتاب، هتلاقي قواعد المنهج العلمي، اللي حطه "الحسن بن الهيثم"، واللي هي ببساطة...
Speaker A
نفس المنهج اللي بيستخدمه العلماء لحد هذه اللحظة، لحد دلوقتي، يا عزيزي. بنبدأ، يا عزيزي، في هذا الكتاب، نرى "ابن الهيثم" الفيلسوف، الفيلسوف اللي بيصك مصطلحاته وبيتابع أنماط فكرية، فبيتكلم مثلًا على حاجة زي الـInduction، "الاستقراء"، ودي معناها إن انت تشوف من ملاحظات جزئية قاعدة عامة،
Speaker A
تلاحظ النمط اللي بيحصل وبيتكرر، وتستنتج منه قانون. "ابن الهيثم" مثلًا شاف الضوء داخل من خُرم صغير في خط مستقيم، ولقى الموضوع بيتكرر باختلاف مصدر الضوء، وكمان، باختلاف الأوساط اللي بيمشي فيها الضوء، فبيستخلص هنا قاعدة عامة، General، على أي ضوء في العالم،
Speaker A
أي ضوء في العالم هيمشي بخط مستقيم، "مع إن أنا، تاني، ما شُفتش كل الضوء في العالَم، أنا شُفت بس الشوية دُول، ومن هنا، بحكُم على الكل." "نيوتن" شاف التفاحة بتقع على كوكب "الأرض"، ما جربش يعملها على كوكب "المريخ"،
Speaker A
ما جربش يعملها على كوكب بعيد عننا، قال إن اللي بيحصل هنا هيفضل يحصل في كل حتة، وقال إن القاعدة دي بتتطبّق على الموز، عادي، الجوافة، ما فيش مشكلة.
Speaker A
هنا، انت بتقدر توصل من نماذج أو Examples حاجات في سياقات معيّنة لقاعدة عامة، الجاذبية هتوقّع أي جسم على الأرض. دا Induction.
Speaker A
عكسه بقى الـDeduction، وهو الاستنباط، دا تاني مبدأ بيتكلم عنه "ابن الهيثم"، ودا معناه إن انت تطبّق قاعدة عامة على حالة خاصة، زي مثلًا قانونه إن الضوء بينكسر لمّا يعدّي من بين أوساط بكثافات مختلفة.
Speaker A
هنا، احنا معانا قانون عام، "لمّا الوسط، يا جماعة، بيتغير، الضوء بينكسر." فهنا ببساطة، لمّا نشوف معلقة الشاي مكسورة جوا الكوباية، نقول: "آه، دي حالة من حالات انكسار الضوء، من القاعدة العامة اللي احنا نعرفها." عادةً دا، يا عزيزي، بيحصل في مجال الرياضيات.
Speaker A
قد تفترض، يا عزيزي، إن "ابن الهيثم" علّم على الفلاسفة، وادّاهم Course في الـEpistemology ما خلّاهومش ياخدوا بعده دروس!
Speaker A
قد تظن إن الموضوع خلص لحد كدا. "ابن الهيثم" بعد كدا بيخُشلك بـ"القياس"... لو عندك قانون عام، مُثبَت وشغال، بيطبّق على حالة معيّنة، في المنطق كدا، لو طبّقته على حالة تانية، هيشتغل برضه.
Speaker A
يعني مثلًا، العمود بيعمل ضِل، ليه؟ لأن الضوء بيمشي في خطوط مستقيمة، بعض الضوء دا بيخبط في العمود ما بيعرفش يعدّي، فظل العمود بيبان على الأرض، بالقياس، الشجرة بتعمل ضل على الأرض لنفس السبب، اللي يمشي على دا، بالقياس، يمشي على دا ودا ودا.
Speaker A
الحاجات دي كلها بتبيّنلنا إن "ابن الهيثم" لم يكُن ناقم على الفكر الفلسفي بتاع "أرسطو"، بالعكس، الراجل برضه بيستخدم المنطق، بعض القواعد دي بالفعل كانت موجودة عند الفلاسفة، هو بس قام مجمّع القواعد دي وقام منظمها، وأضاف عليها التجربة والإثبات كأهم قاعدة،
Speaker A
وعشان كدا، منهج "ابن الهيثم" العلمي فضِل أهم منهجية لأي عالم لحد النهاردة، من يوم ما الراجل عمل هذا المنهج لحد تصوير هذه الحلقة، واحنا شغالين بشغل "ابن الهيثم"، الله ينوّر يا عم "الهيثم"!
Speaker A
كل الإضاءة والكاميرات، والعدسة 35 والعدسة 70، دا شغله. عشان كدا، بنلاقي مؤرخين كتير بيعتبروه أول عالِم في العالَم، لأنه ببساطة، هو اللي عمل المنهج، اللي مشي عليه علماء مهمين جدًا، علماء زي "دافنشي" و"جاليليو"، و"فرانسيس بيكون"، حبيب "محمد خميس"!
Speaker A
الراجل دا مش بس مشي على منهج "ابن الهيثم"، لا، دا حَرْفيًا خَدُه منه، منهج "فرانسيس بيكون" اللي بيُسمى بالمنهج الاستقرائي قائم على قواعد "الحسن بن الهيثم"، وخلّيني أقولّك إن "فرانسيس بيكون" جه بعد "ابن الهيثم" بـ6 قرون، 600 سنة تقريبًا،
Speaker A
احتمالات إن "ابن الهيثم" هو اللي سارقها منه صعبة شوية! "اللهم صلِّ على النبي، يا (أبو حميد)، ارجع!" بعد ما "ابن الهيثم" بيخلّص كل الـAction اللي في حياته، بيقرر إن هو يسلّم راية العِلم للجيل اللي بعده، وحَرفيًا، بيبدأ يحجز دروس،
Speaker A
ويظهر عنده طالب نجيب اسمه "المبشّر بن فاتك"، دا اللي "ابن الهيثم" علّمه الفك والرياضيات والهندسة، وكل ما أوتي من عِلم، عشان كدا، فضل "المبشّر" مع "ابن الهيثم" لحد آخر لحظة في حياته، اللحظة اللي بيشاور فيها "ابن الهيثم" على كتاب "المناظر"، وبيقول لتلميذه:
Speaker A
"أعتقد إن الكتاب دا هيفتح للأجيال الجاية أبواب من المعرفة لا يعلم مداها إلا الله." بعدها، سنة 1040 ميلاديًا، علاقة "ابن الهيثم" بالنور بتنتهي تمامًا، العين اللي ما بطّلتش تتقفل، اتقفلت للمرة الأخيرة، بعد ما Ironically Enough نوّرت كل عيون البشر،
Speaker A
وعرّفتهم إن النور الحقيقي ما بيجيش من عينيهم. بنشوف بعد كدا، سنة 1826، في قرية صغيرة في "فرنسا"، بيقدر "نيسفور نيبس" لأول مرة في التاريخ، يا عزيزي، إنه يحفظ لحظة في الزمن.
Speaker A
طول عمر، يا عزيزي، الوقت كان بيعدّي علينا كدا، وخلاص، اللحظة اللي بنشوفها بتختفي للأبد، ما بتشوفهاش غير لحظة ما شُفتها، وبعد كدا، بتتنسي، الدنيا عندنا قبل هذا اليوم كانت ماضي ومستقبل، فكرة إن انت تعرف تجمّد لحظة من الحاضر، وتعينها،
Speaker A
حاجة عينك شافتها، ابنك يشوفها، أو حد تاني بعدك يشوفها نفس ما انت شُفتها، دي فكرة غريبة جدًا على الإنسان وعمرها على الأرض ما كمّلش 200 سنة، "نيسفور" خلّى الضوء هو اللي يرسم على الحيطة بدل الفرشاة، كل دا عن طريق إيه؟ صندوق خشب، فتحة صغيرة، ومادة حساسة للضوء.
Speaker A
عشان نشوف بعد أكتر من 8 ساعات القمرة بتتحول إلى الكاميرا، الكاميرا اللي صورتلك عيد ميلادك وانت صغير، والكاميرا اللي بتوثّق أبشع الحروب في العالم، الكاميرا اللي صورت "الأرض" من الفضاء، وصورت الفضاء من "الأرض"، الكاميرا الـ2 ميجا بكسل"، بتاعة أول تليفون ليك، الموتورولّا أبو باب،
Speaker A
لحد الكاميرا الـ"سوني" الـFX3، اللي بتصورني دلوقتي. وربنا وحده اللي عالم بنجيب إيجارها ازاي! كل الكاميرات دي كان سببها عالِم عظيم، قضّي سنين طويلة من حياته في الضلمة، عشان يشرحلنا يعني إيه نور.
Speaker A
بس كدا، يا عزيزي. أخيرًا، وليس آخرًا، ما تنساش تشوف الحلقات اللي فاتت، تشوف الحلقات الجاية، تنزل تبص على المصادر، ولو احنا على الـ"يوتيوب"، نشترك على القناة.
Speaker A
ويا عزيزي، ما ننساش ننوّر الضلمة. انت عارف، يا عزيزي، إيه الفيلم المفضّل لـ"الحسن بن الهيثم"؟ - "إيه يا (أبو حميد)؟!" - فيلم Shutter Island!
Speaker A
"طب يا (أبو حميد)، ومسلسله المفضّل؟" لأ، يا عزيزي، دي سهلة، Flash! عارف، يا عزيزي، إن مرة "ابن الهيثم" حاولوا يسمموه بمادة شديدة القلوية؟ "يا ساتر يا رب! طب وعمل إيه؟!" ولا حاجة، حمّضها.
Speaker A
ظبط الـPH على 7، وشِرب!
Topics:الحسن بن الهيثمالدحيحالعصر الذهبي الإسلاميبيت الحكمةالمنهج العلميالبصرياتمصر 1006 ميلاديًاالحاكم بأمر اللهالعلوم الإسلاميةالتجربة العلمية
