Speaker A
سلام عليكم. فيديو النهارده قد يكون أهم فيديو أنا عملته على اليوتيوب، وهو فيديو إزاي تعرف إنك أنت مدمن قمار. إيه العلامات اللي لو لقيتها في نفسك تعرف إنك أنت مدمن على تطبيق 1xBet أو أي تطبيق من تطبيقات القمار الإلكترونية، وإزاي تقدر تعالج نفسك أو تساعد نفسك للخروج من دائرة الإدمان دي ومن الحالة اللي أنت فيها؟ قبل ما أبدأ الفيديو، كل اللي طالبه منكم إنكم تبعتوا الفيديو ده لكل شخص تعرفه إن هو بيلعب 1xBet. الفيديو ده مهم جدًا يا جماعة. وثاني حاجة طالبها منكم إنكم تدعموا الفيديو ده بلايك بكومنت بانكم تاخدوا الفيديو ده شير وتحطوا اللينك بتاعه على الواتس بتاعكم، تبعتوه لكل الناس وتشيروها في كل مكان لعل وعسى يكون خير وثواب ليا وليكم. ويلا بينا نبدأ. إزاي تعرف إنك أنت مدمن على القمار؟ إزاي تعرف إنك أنت مش قادر تبطل 1xBet وإنك أنت فعلاً مدمن؟ سبع علامات ما لهمش تامن. السبع علامات دول لو عندك منهم بعض العلامات فأنت كده مدمن. العلامة الأولى: ما بتقدرش إنك أنت تتحكم في فلوسك. أول ما تقبض المرتب بتاعك تروح بسرعة تحط منه 200 ولا 300 جنيه علشان تلعب على تطبيق 1xBet أو على تطبيقات القمار بشكل عام. تجري على طول. أول حاجة بتفكر فيها أول ما تسلم الفلوس إنك تروح تلعب. ولو خسرت الفلوس اللي أنت لعبت بيها تروح تحط ثاني وثالث لحد ما تخسر كل الفلوس اللي أنت بتملكها أو الراتب بتاعك. ولو معاك أي ممتلكات تقدر إنك أنت تبيعها علشان تسيل الفلوس بتاعتك علشان تلعب هتعمل كده. ما بتقدرش إنك أنت تتحكم بفلوسك بأي شكل من الأشكال. فده أول دليل على إنك أنت قد تكون مدمن قمار. ثاني علامة بتثبت لك إنك أنت قد تكون مدمن قمار هي إنك أنت بتدور على أي حد تقترب منه فلوس علشان تلعب أو بتحاول إنك أنت تسرق علشان تلعب. بتقترب من الفلوس أو بتسرقها. أول ما تلاقي نفسك ما معكش فلوس تبدأ تفكر: أهلك من حواليك مين ممكن يكون معاه فلوس؟ تروح تستلف منه. أختك معها فلوس دروس، أخوك راح يبيع العربية بتاعته، تقوم واخد منه قرشين مش عارف. باباك شايل فلوس في حتة، مامتك شايلة الدهب بتاعها في مكان. المهم إنك أنت هتروح تدور على أي مكان فيه فلوس علشان تاخد الفلوس دي علشان تروح تلعب على تطبيقات القمار. ولو أنت ما عندكش في أهلك حد تقدر إنك أنت تستلف منه فلوس أو تسرق منه فلوس، فهتبقى إنك أنت تدور على كارد تاخده من البنك أو أي حاجة تخليك تقدر إنك أنت تتحصل على فلوس في أسرع وقت ممكن حتى لو كانت الحاجة دي ممكن إن هي تدمر لك حياتك. ثالث علامة بتتفاعل مع نصائح الناس بشكل سلبي. يعني إيه الكلام ده؟ يعني لو حد قال لك يا أخي بطل بقى كفاية عليك، حرام عليك اللي أنت بتعمله في نفسك، أول رد هيكون منك: مالكش دعوة، هو أنت مالك ومالي؟ يا عم أنا عايز ألعب بعد إذنك، مالكش فيه. ممكن تقول له: يا عم أنا أصلاً الموضوع ولا فارق لي، أنا بعمل كده عشان بتسلى. الفلوس دي تحت رجلي، أنا أهم حاجة عندي إن أنا أكون مبسوط، أما أي فلوس تحت رجلي المواضيع دي ما بتفرقش معايا. خلي في علمك ولا يفرق معايا بقى إن أنا مستلف ولا يفرق معايا، أنا بتسلى والفلوس اللي أنا مستلفها دي أقدر أسدها في أي وقت. طبعًا لو لقيت نفسك بتتكلم بالأسلوب ده مع أي حد بيديك نصيحة، تأكد إنك أنت مدمن على القمار وألعاب القمار الإلكترونية. ونيجي للعلامة الرابعة: الضعف الشديد في الاهتمام بأسرتك وحبايبك وأهلك وناسك. لما تلاقي نفسك بتتعامل مع أسرتك بشكل فيه جفاء، لما تلاقي إن أي حد من أسرتك يجي يكلمك تلاقيك متعصب، خاصة لو بتلعب. يجي حد بس يقول لك: إزيك؟ إيه يا عم؟ أنت بتقول لي إزيك ليه؟ أنت مالك ومالي؟ ما تسيبني في حالي. تلاقي نفسك بتحب تنعزل. تلاقي نفسك عندك استعداد إنك أنت تقعد في أي قعدة فيها أصحابك اللي بيلعبوا قمار، ولكن ما عندكش استعداد إنك أنت تقعد مع أهلك 10 دقائق على بعض من كتر ما أنت مشدود ومنجبه وعايز تفضل في الدائرة دي 24 ساعة في الـ 24 ساعة حتى لو بتخسر وحتى لو حياتك في النازل. إحساس التعويض بيخليك إنك أنت تبعد عن كل حبايبك وكل الناس اللي أنت بتعزهم وتميل لأنك أنت تبقى لوحدك. خامس علامة: فقدان الهوايات والاهتمامات. يعني إيه الكلام ده؟ يعني أنت كنت بتروح النادي تلعب أي رياضة: كونفو، تايكوندو، كاراتيه، سباحة. تلاقي نفسك مش عايز إنك أنت تلعب رياضة تمامًا وحابب إنك أنت تقعد مع نفسك وتلعب قمار. تلاقي نفسك بدأت مثلاً لو بتروح الجيم بطلت تروح جيم، بتروح تقرأ كتاب، تقعد في مكتبة، تقعد على كافيه، تشم هوا، تقعد مع صحابك، كل ده تلاقيه بالتدريج بتفقده تمامًا. ولو حتى هيبقى عندك صحاب، هيبقى عندك صحاب شبهك بالظبط بيميلوا لأنهم يعملوا أي حاجة تخليهم يلعبوا قمار. عندهم استعداد يعملوا أي حاجة في مقابل إنهم يفضلوا قاعدين القعدة دي على لعبة الطيارة، على كريستال، على تفاحة، على القمار. سادس علامة: الاكتئاب والتفكير في الانتحار عند الخسارة. مع كل مرة بتخسر فيها مبلغ كبير تميل إنك أنت تكتئب ومش عايز تكلم حد وحابب إنك أنت تقعد مع نفسك. حتى القعدة مع نفسك لا عارف تقعد مع صحابك ولا عارف تقعد مع نفسك ولا عارف تروح ولا تيجي، مخنوق على طول، حالة من الاكتئاب دائمة معاك وبتفكر في الانتحار أحيانًا وبيجيلك أفكار وميول انتحارية. تأكد إنك أنت مدمن على القمار وإن القمار متملك منك ومسيطر عليك. فيا ترى لما توصل للمرحلة دي ولما تكتشف إنك وصلت للحالة دي، هل لسه ما عندكش استعداد إنك أنت تبطل؟ هل لسه مستعد تفضل في دائرة الإدمان؟ تأكد كويس قوي لو أنت مازلت بتلعب إنك حتى لو لعبت وكسبت في أي يوم، كونك مدمن، فتأكد إنك هتفضل تلعب بالمبلغ ده لحد ما تخسره عن آخر جنيه. كسبت 100000، كسبت 200000، كسبت مليون، هتخسر وهترجع لنفس نقطة الصفر. ليه؟ لأنك بقيت مدمن للعبة. اللعبة متملكة ومسيطرة عليك. أي فلوس هتكسبها هتحطها في اللعبة وهتخسر برضه. وأخيرًا العلامة رقم سبعة، وهي من العلامات الشهيرة جدًا. العلامة رقم سبعة بتقول إنك أنت بتكدب في المبلغ اللي أنت خسرته. يعني مثلاً تبقى قاعد مع صحابك، يجي يقول لك: أنت خسرت كتير صح؟ تقول له: لا لا مش كتير ولا حاجة، يعني مجرد 500000 جنيه. وأنت خسران مليون؟ لا والله، أنا ولا بعت، يعني بس هو الموتوسيكل اللي أنا بعته ده، والحمد لله قدرت إن أنا أجيب ثمنه من اللعبة عادي جدًا. يعني اللعبة ما أثرتش عليا ولا حاجة. وأنت خسران ثمنه وثمن عربيتين كمان، ولكن أنت مصر إنك أنت تداري على الخسائر بتاعتك علشان ما تتفضحش في وسط أهلك وفي وسط أصحابك. فلو أنت بتعمل أي علامتين أو تلاتة من السبعة دول، تأكد إنك أنت مدمن قمار ولازم لازم إنك أنت تتعالج، لأن لو فضلت مكمل هتخسر حياتك كلها. طب تتعالج إزاي؟ تعال نشوف مع بعض. تتعالج إزاي؟ العلاج أو أول طريق العلاج هو التمسك بحبل الله. واعتصموا بحبل الله جميعًا ولا تفرقوا. لازم إنك ترجع لربنا. الاستعانة بالسماء هي أفضل طريق لأنك توصل لأنك تبطل، توصل لأنك أنت تبعد عن طريق الشيطان. إنما الخمر والميسر والأنصاب والأزلام رجس من عمل الشيطان. الشيطان هو اللي صنعهم. فأنت هنا الشيطان متملك منك كليًا. أنت دخلت جوه لعبة الشيطان، جوه طريق الشيطان. فإزاي هتقدر إنك أنت تبعد عن الشيطان لو ما كنتش متمسك بالله؟ إذًا لازم إنك أول حاجة تعتصم بحبل الله، تتمسك بالله. طب أنت مش قادر تصلي؟ ادعي. مش قادر تدعي؟ شغل قرآن في بيتك. مش قادر تشغل قرآن في بيتك؟ صلي على النبي كل يوم. اعمل أي حاجة تخلي في صلة بينك وبين ربك بأي شكل وبأي وسيلة مهما كانت الوسائل اللي أنت هتستخدمها قد تكون شايف إن هي ضعيفة، ولكن هتخلي في صلة بينك وبين ربنا، هتخلي عندك تمسك وإرادة إنك أنت تبطل. طب ثاني حاجة لازم تعملها إنك أنت تصارح أهلك حتى لو هتصارح واحد أو اثنين. لو أهلك هيعاكسوا عليك، هيفضحوا، هيعملوا لك مشاكل، فقول لأكثر ناس بتثق فيهم وشايف إنهم ممكن يساعدوك. بس لازم تقرب من الصالحين، من اللي بيحبوك بجد، من اللي بيخافوا عليك، وتحكي لهم كل حاجة من الألف للياء حتى لو فيها فضيحتك. هتتفضح النهارده شوية والناس بتنسى. بس لما تتلاحق وتلحق نفسك وتقوم وتفوق وتقف على رجلك، صدقني ما حدش هيفتكر لك إنك أصلاً كنت بتلعب قمار ولا إنك خسرت فلوس في القمار. لكن لو فضلت مكمل، النهاية وحشة قوي والله، وحشة قوي قوي قوي. ثالث حاجة مهمة جدًا إنك أنت تستعين بالدكاترة النفسيين. لو كان بإيدك إنك أنت تتعامل وتتواصل مع دكتور نفسي، روح لدكتور نفسي، احكي له الحكاية، خليه يحاول إنه يشدك ويعينك، لأن الدكاترة النفسيين أكيد عندهم علاج سلوكيات الإدمان والسلوك القهري، وهيقدروا إن هم يقفوا جنبك ويساعدوك ويعاونوك، ولأنهم دارسين كويس بخصوص الموضوع ده. فتعامل مع الدكاترة النفسيين لو كان بإيدك إنك أنت تتواصل مع دكتور نفسي. ونيجي للحاجة الرابعة وهي امسح محفظتك الإلكترونية. امسح محفظة فودافون كاش أو أصولات كاش أو أورانج كاش. امسح المحافظ علشان ما يبقاش لك أي صلة ربط تقدر إنك أنت من خلالها تعمل إيداع وسحب بسهولة. ولو عندك محفظة ما تمسحهاش، ما تخليش فيها فلوس على الإطلاق. أي فلوس هتخليها على المحفظة تأكد إنك أنت هتلعب بيها. وأخيرًا لو تقدر إنك أنت تبيع موبايلك لحد من قرايبك أو تخلي الموبايل مع حد ما تمسكه أبداً لفترة معينة من الزمن، ولتكن شهرين علشان تقدر تتخلص من إحساس الإدمان. اعمل كده لو تقدر إنك أنت تبيع موبايلك بيعه، وهات موبايل بزرائر. أهم حاجة اقطع كل الحبال اللي ممكن إن هي تربطك باللعبة. الفترة الأولى لأنك في أول فترة بتبقى زي المدمن اللي مدمن على حاجة شديدة قوي زي الهيروين مثلاً، بتبقى هجنن وتاخد الشمة بتاعتك اللي هي اللعبة اللي أنت كنت بتلعبها أثناء ما كنت بتلعب على تطبيقات القمار الإلكترونية. في النهاية، يا رب يكون الفيديو فادك. يا رب أكون قدرت أوصل لك معلومة مفيدة. لو فعلاً الفيديو فادك، ما تنساش اللايك، الكومنت، الشير، ويا ريت إنكم بتدعوا الوالدي بالرحمة.
